नेपाली क्रिकेट टिमका प्रशिक्षक ह्वाटमोरले दिए राजीनामा

नेपाली राष्ट्रिय क्रिकेट टिमका प्रशिक्षक डेव ह्वाटमोरले राजीनामा दिएका छन् । प्रशिक्षक ह्वाटमोरले नेपाल क्रिकेट संघ (क्यान) लाई शुक्रबार इमेलमार्फत राजीनामा पठाएका हुन् ।

उनी अहिले आईसीसी विश्वकप लिग २ का लागि ओमानमा रहेका छन् । उनले आफ्नो व्यक्तिगत कारणले ओमान भ्रमणपछि आवद्ध हुन नसक्ने भन्ने आशयको इमेल पठाउएको क्यानका अध्यक्ष चतुरबहादुर चन्दले बताए ।

‘परिवारलाई धेरै समय दिनुपर्ने हुनाले र कोभिड १९ का कारणले ओमान भ्रमणपछि आवद्ध हुन सक्दिन होला भन्ने आशयको इमेल पठाउनु भएको छ,’ उनले भने

विश्वकप विजेता ६५ वर्षीय प्रशिक्षक ह्वाटमोर गत जनवरीमा मात्र नेपालको प्रशिक्षकमा नियुक्त भएका थिए भने उनको डिसेम्बरसम्म क्यानसँग सम्झौता रहेको थियो ।

आईसीसी विश्वकप लिग २ खेल्नका लागि नेपाली टसम अहिले ओमान भ्रमणमा छ । नेपालले पपुवा न्यु गिनीसँग दुई एकदिवसीय अन्तर्राष्ट्रिय खेलेपछि ओमान र अमेरिकासँग लिग २ का खेलहरु खेल्ने छ ।